އަޅުގަނޑުމެންގެ މަޤްޞަދަކީ ނުކުޅެދުންތެރިކަން ހުންނަ ފަރާތްތަކަށް ވަޒީފާގެ ފުރުޞަތުތައް ފަހިކޮށްދިނުމެވެ. މިގޮތުން، އަޅުގަނޑުމެން ވަޒީފާގެ ފުރުޞަތު ހޯދުމަށް އެދޭ ނުކުޅެދުންތެރިކަން ހުންނަ ފަރާތްތަކުގެ ދަފްތަރު ޤާއިމްކޮށް ބަލަހައްޓައި، އެފަރާތްތަކުގެ ފަންކްޝަނަލް އެސެސްމަންޓްތަކާއި ވަޒީފާގެ ޕްރޮފައިލްތައް ތައްޔާރުކުރަމެވެ. އަދި ވަޒީފާގެ މާޙައުލުގައި ކާމިޔާބުވުމަށް ބޭނުންވާ ހުނަރުތައް ތަރައްޤީކުރުމުގެ ޕްރޮގްރާމްތައް ހިންގުމާއެކު، ސަރުކާރުގެ އެކި މުއައްސަސާތަކާއި ސަރުކާރު ޙިއްސާވާ ކުންފުނިތަކާ ގުޅިގެން ވަޒީފާގެ ފުރުޞަތުތައް އިތުރުކުރުމަށް މަސައްކަތްކުރަމެވެ. މީގެއިތުރުން، ވަޒީފާދޭ ފަރާތްތަކަށް ނުކުޅެދުންތެރިކަމާ ގުޅޭގޮތުން އަހުލުވެރިކުރުމަށް 'އިންކްލޫސިވިޓީ ޓްރެއިނިންގ' ޕްރޮގްރާމްތައް ހިންގައި، ހުރިހާ ފަރާތަކަށްވެސް ހަމަހަމަ މާޙައުލެއް ޤާއިމްކުރުމަށް އެހީތެރިވަމެވެ.

ނުކުޅެދުންތެރިކަން ހުންނަ މީހުންގެ ޙައްޤުތައް ކަށަވަރުކުރުމަށް 5 އަހަރުގެ "ނޭޝަނަލް އެކްޝަން ޕްލޭން އޮން ޑިސްއެބިލިޓީ އިންކްލޫޝަން" އެކުލަވާލެވި، ޞިއްޙީ، ތަޢުލީމީ، އިޤްތިޞާދީ އަދި އިޖުތިމާޢީ ގޮތުން ދިމާވާ ގޮންޖެހުންތަކަށް ހައްލު ހޯދުމަށް ކަމާބެހޭ ވުޒާރާތަކާއި ނުކުޅެދުންތެރިކަން ހުންނަ މީހުން ތަމްސީލުކުރާ ޖަމްޢިއްޔާތަކާއެކު މަސައްކަތްކުރެވެމުންދެއެވެ.

ނުކުޅެދުންތެރިކަން ހުންނަ ފަރާތްތަކުގެ ޙައްޤުތައް ކަށަވަރުކުރުމާއި އެފަރާތްތަކަށް ދިމާވާ ތަފާތުކުރުންތައް "ވިޔަނުދިނުން" ގެ އަމާޒުގައި، މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓްއިން ދަނީ ނުކުޅެދުންތެރިކަން ހުންނަ ފަރާތްތަކަށް ވަކާލާތުކޮށް، އެފަރާތްތަކުގެ އަޑު އުފުލައިދިނުމަށް މަސައްކަތްކުރަމުންނެވެ. މުޖުތަމަޢުގައި ނުކުޅެދުންތެރިކަން ހުންނަ ފަރާތްތަކާމެދު ގެންގުޅޭ ނޭދެވޭ ވިސްނުންތައް ބަދަލުކޮށް، އެފަރާތްތަކަކީވެސް މުޖުތަމަޢުގެ އެހެން ފަރާތްތަކެކޭ އެއްފަދައިން ޙައްޤުތަކެއް ލިބިގެންވާ ބައެއްކަން ހާމަކުރުމަށް "ވިޔަނުދިނުން" ގެ ދަށުން އަމާޒު ހިފިފައިވެއެވެ.

މި ވުޒާރާއިން ހުޅުމާލޭ ފޭސް 2 ގައި ކުރިއަށް ގެންދިޔަ 'ޙާލު ކިހިނެއް؟' ޕްރޮގްރާމުގެ ތެރެއިން ދެނެގަނެވުނު ނުކުޅެދުންތެރިކަން ހުންނަ ފަރާތްތަކުގެ ބެލެނިވެރިންގެ ތެރެއިން ނަފްސާނީ އެހީތެރިކަމާއި، ބެލެނިވެރިކަމުގެ ހުނަރުތައް ދެނެގަންނަން ބޭނުންވާ ފަރާތްތަކަށް ޚާއްޞަކޮށްގެން 'ސަޕޯޓް ގްރޫޕްތައް' ހިންގަން ފަށައިފި. މިއީ މޮމްސް އެއިޑާ ގުޅިގެން ކުރިއަށް ގެންދާ ޕްރޮގްރާމެއް. މި ޕްރޮގްރާމުގެ ފުރަތަމަ ބެޗުގެ ބައިވެރިންނާ ވަޒީރު ޑރ. ޢާއިޝަތު ޝިހާމް ވަނީ ބައްދަލުކުރައްވައި، ނުކުޅެދުންތެރިކަން ހުންނަ ކުދިން ބެލެހެއްޓުމުގައި ބެލެނިވެރިންގެ ފަރާތުން ފެންނަ އޯގާތެރިކަމާއި ކެތްތެރިކަން ފާހަގަކޮށް ބެލެނިވެރިންނަށް ހިތްވަރުދެއްވާފަ.