ފެމިލީ އެންޑް ޗިލްޑްރަން ސަރވިސް ސެންޓަރުތައް 19 އަތޮޅުގައި ވަނީ ގާއިމްކުރެވިފައެވެ. ފެމިލީ އެންޑް ޗިލްޑްރަން ސަރވިސް ސެންޓަރުތައް ގާއިމްކުރެވިފައިވަނީ ޚާއްސަ ރާއްކާތެރިކަން ބޭނުންވާ އަންހެނުންނާއި، ކުޑަކުދިންނާއި، އުމުރުންދުވަސްވީ މީހުންނާއި، ނުކުޅެދުންތެރިކަން ހުންނަ ފަރާތްތަކަށް ރައްކާތެރިކަމާއި އެހީތެރިކަން އަތޮޅު ފެންވަރުގައި ފޯރުކޮށްދިނުމަށެވެ.

ފެމިލީ އެންޑް ޗިލްޑްރަން ސަރވިސް ސެންޓަރުތަކުގެ މަސައްކަތްތައް

އިޖްތިމާޢީ ރައްކާތެރިކަން

ރާއްޖޭގެ އަތޮޅުތަކުގައި ދިރިއުޅޭ އަންހެނުންނާއި، ޢުމުރުން ދުވަސްވީ މީހުންނާއި، ޚާއްޞަ އެހީއަށް ބޭނުންވާ މީހުންނާއި، ކުޑަކުދިންގެ ޙައްޤުތަކާ ގުޅޭގޮތުން އެފް.ސީ.އެސް.ސީއަށް ހުށަހެޅޭ މައްސަލަތައް ބަލައި، ކަމާބެހޭ އިދާރާތަކުގެ އެހީތެރިކަމާއި އެއްބާރުލުމާއެކު މިނިސްޓްރީގެ ގުޅުން ހުރި ފަރާތްތަކާއި ކޯޑިނޭޓްކޮށް މަސައްކަތް ކުރެއެވެ.

ހޭލުންތެރިކަން އިތުރުކުރުން

އިޖްތިމާޢީ މައްސަލަތަކާއި ގުޅޭގޮތުން ޢާއްމުން ހޭލުންތެރިކަން އިތުރު ކުރުމުގެ އިތުރުން އިޖުތިމާޢީ ޚިދުމަތް ފޯރުކޮށް ދިނުމަށްޓަކައި ވުޒާރާގެ މެންޑޭޓްގެ ތެރެއިން ކުރަންޖެހޭ އެންމެހާ މަސައްކަތްތައް ކުރުމަށް އިސްކަންދެއެވެ.

އެފް.ސީ.އެސް.ސީގެ ސެންޓަރުތަކުގެ ބާވަތްތައް

ރާއްޖޭގެ 19 އަތޮޅުގައި މި ވުޒާރާގެ ބެލުމުގެ ދަށުން ޤާއިމު ކުރެވިފައިވާ އިދާރާތައް ދެ ބާވަތަކަށް ބެހިގެންވެއެވެ:

އަމާންވެށި ސެންޓަރުތައް

ހއ، ށ، ނ، ބ، ފ، ދ، ލ، އަދި ޏ އަތޮޅުގައި ގާއިމުކޮށްފައިވާ ސެންޓަރުތަކަކީ:

• ލާމަރުކަޒީކޮށް މިނިސްޓްރީން ދޭ ޚިދުމަތްތައް ފޯރުކޮށްދިނުމުގެ އިތުރުން
• މިނިސްޓްރީގެ މެންޑޭޓްގެ ތެރެއިން ދައުލަތުގެ ބެލުމުގެ ދަށަށް ނެގޭ ކުދިން ބެލެހެއްޓުމުގެ ގޮތުން ގާއިމުކޮށްފައިވާ 'އަމާންވެށި' ބެލެހެއްޓުމުގެ ޒިންމާ މަތިކުރެވިފައިވާ ސެންޓަރުތަކެވެ.

އަމާންހިޔާ ސެންޓަރުތައް

ހދ، ތ، އަދި ގދ އަތޮޅުގައި ޤާއިމުކޮށްފައިވާ ސެންޓަރުތަކަކީ:

• ލާމަރުކަޒީކޮށް މިނިސްޓްރީން ދޭ ޚިދުމަތްތަކުގެ އިތުރުން
• ގެވެށި އަނިޔާއާއި ގުޅިގެން މިނިސްޓްރީއަށް ހުށަހެޅޭ މައްސަލަތާކުގައި ނަފްސާނީ އަދި އިޖުތިމާޢީ އެހީތެރިކަން ފޯރުކޮށްދިނުމަށް ޤާއިމްކޮށްފައިވާ 'އަމާންހިޔާ' ބެލެހެއްޓުމުގެ ޒިންމާ މަތިކުރެވިފައިވާ ސެންޓަރުތަކެވެ.